ગુજરાતની લાડલી દીકરી પાયલોટ બની, 11 વર્ષની ઉંમરે જોયેલું સપનું 26માં વર્ષે પૂર્ણ થયું, જુઓ તસવીરો

કાચા મકાનમાં રહેતી લાડલી દીકરી કહેતી મમ્મી હું એક દિવસ વિમાન ઉડાવીશ, પપ્પા મારે પાયલોટ બનવું છે. ધોરણ 6માં અભ્યાસ કરતી એક સામાન્ય પરિવારની ખેડૂત પુત્રી ઉર્વશી દુબેએ આકાશમાં ઉડતા એરક્રાફ્ટને જોઈ સેવેલું સ્વપ્નું આજે સાકાર થયું છે. કાચા મકાનમાં રહેતી ઉર્વશી અનેક આર્થિક કઠણાઈઓને પાર કરી આજે કોમર્શિયલ પાયલોટ બની આભમાં ઊંચી ઉડાન ભરી રહી છે.

ભરૂચ જિલ્લાના જંબુસર તાલુકાના છેવાડાના કીમોજ ગામમાં માટીવાળા કાચા ઘરમાં રહેતી ખેડૂતની પુત્રી ઉર્વશી દુબે પાયલોટ બની ઘરે આવતા જે લોકો તેના બચપનના પાયલોટ બનવાના સપનાની મજાક ઉડાવતા હતા તે આજે આ દીકરીને વધામણાં આપી રહ્યાં છે.

અનેક મુશ્કેલીઓ વચ્ચે ઉર્વેશી પાયલોટ બની
કિમોજ ગામના ખેડૂત અશોકભાઈ અને માતા નીલમબેનની દીકરી ઉર્વશીને નાનપણમાં ધોરણ 6માં અભ્યાસ કરતી વખતે આકાશમાં ઉડતા વિમાનને જોઈ મનમાં સવાલ ઉઠ્યો હતો.

આ પ્લેન ઉડાવવા વાળો પણ એક ઇન્સાન જ હશે અને ત્યારથી નાનકડી ઉર્વશીએ પાયલોટ બની પ્લેન ઉડાવવાનું નક્કી કરી લીધું. ભત્રીજીને પાયલોટ બનાવવા કાકા પપુ દુબેએ ખર્ચ ઉઠાવ્યો, પણ કાકાના કોરોનામાં અકાળે મોત બાદ અનેક આર્થિક મુશ્કેલીઓ આવી.

ગામની ગુજરાતી પ્રાથમિક શાળામાં જ શિક્ષણ લીધું
ઉર્વશીએ ગામની જ ગુજરાતી શાળામાં જ પ્રાથમિક શિક્ષણ મેળવ્યું હતું. જ્યાં શિક્ષકો અને સિનિયરોને પાયલોટ બનવા શું કરવું? તે પૂછી તે આગળ વધી. 12 સાયન્સ મેથ્સ સાથે લઈ તે આગળ વધી પાયલોટ બનવા લાખોનો ખર્ચ થતો હોવાનું જાણવા મળ્યું. જોકે ખેડૂત પિતા અને દુબે પરિવારે દીકરીને પાયલોટ બનાવવાનો નીર્ધાર કરી લીધો હતો.

જંબુસરથી વડોદરા, ત્યાંથી ઈન્દોર બાદમાં દિલ્હી અને છેલ્લે જમશેદપુરમાં ઉર્વશીનું કોમર્શિયલ પાયલોટનું લાયસન્સ આવતા પાયલોટ બનવાનું સ્વપ્ન સાકાર થયું. તેણે ગામના એક સામાન્ય ખેડૂત પરિવારની પુત્રી ઓપન કાસ્ટને લઈ સરકારી લોન સાથે ખાનગી બેંકોમાં પડેલી હદ વગરની તકલીફો તેમજ કલાકની ફ્લાઈંગ માટે ભરવાના હજારો રૂપિયા અને લાખોની ફી અંગે પણ વેદના વ્યક્ત કરી હતી. જોકે જેટલી તકલીફો પડી તેટલા મદદગાર પણ મળ્યા હોવાનો આંનદ વ્યક્ત કર્યો હતો.

મારા પિતાએ મને ક્યારે ના નથી પાડી- ઉર્વશી દુબે
ભરૂચ જિલ્લાની પ્રથમ પાયલોટ બનનાર ઉર્વશી દુબે કહ્યું હતું કે, પાયલોટ બનવાનું મારું નાનપણથી સપનું હતું. મારા પિતા ખેડૂત છે. પાયલોટ બનવામાં મોટો ખર્ચ હતો પણ મારા પિતાએ મને ના ન પાડી. જેટલી મદદ થાય તેટલી કરવાની વાત કરી. મારી પાસે પાયલોટ કઈ રીતે બનવું તેની માહિતી પણ ન હતી.

પણ હું શિક્ષકો અને સિનિયરની મદદ લઈ આગળ વધતી ગઈ. 12 સાયન્સમાં મેથ્સ જરુરી હોવાથઈ મેં વીથ મેથ્સ 12 સાયન્સ પાસ કર્યું. ત્યારબાદ મેં ઈન્દોર એડમિશન લીધું. મને શરૂઆતમાં ભાષાની તકલીફ પડતી હતી પણ મેં ક્યારેય હાર ન માની.