હાઈવે પર મૂકેલા સિમેન્ટના બ્લોક સાથે ધડાકાભેર કાર અથડાતા ભડભડ સળગી ઉઠી, 3 યુવકો જીવતા સળગી ગયા

એક ગોઝારા અકસ્માતમાં MBBSમાં ભણતા ત્રણ આશાસ્પદ યુવકોના જીવતા સળગી જવાના કારણે મોત થયા છે. યુવકો જે કારમાં સવાર હતા તે હાઈવે પર મૂકવામાં આવેલા સિમેન્ટના હેવી બ્લોક સાથે ધડાકાભેર અથડાઈ હતી. ટક્કર બાદ ગાડી પલ્ટી ખાઈ ગઈ હતી અને તેમાં જોતજોતામાં જ આગ ફાટી નીકળી હતી. જેમાં તેની અંદર સવાર ત્રણ યુવકો જીવતા જ ભડથું થઈ ગયા હતા જ્યારે અન્ય ત્રણ યુવકો ગંભીર રીતે દાઝી ગયા છે.

Advertisement

મૃતકોના માતાપિતાનો આક્ષેપ છે કે, હાઈવે પર કામ ચાલી રહ્યું હોવાથી સિમેન્ટના બ્લોક મૂકાયા હતા, પરંતુ તેને અંધારામાં જોઈ શકાય તેવી કોઈ સાઈન કે રિફ્લેક્ટર ના લગાવાયા હોવાથી આ અકસ્માત થયો છે.

Advertisement

પ્રાપ્ત વિગતો મુજબ હરિયાણાની આ ઘટનામાં મોતને ભેટેલા યુવકો PGIMS રોહતકના સ્ટૂડન્ટ્સ હતા. તેઓ રોહતકથી હરિદ્વાર જઈ રહ્યા હતા. બુધવારે રાત્રે તેમની કાર જાલર-મેરઠ હાઈવે પર પૂરપાટ દોડી રહી હતી ત્યારે આ અકસ્માત થયો હતો. પોલીસના જણાવ્યા અનુસાર, હાઈવે પર કામ ચાલી રહ્યું હોવાથી એક તરફના રસ્તાને સિમેન્ટના બ્લોક મૂકીને બંધ કરવામાં આવ્યો હતો.

મૃતકોની ઓળખ પુલકિત, સંદેશ તેમજ રોહિત તરીકે કરવામાં આવી છે, જેઓ થર્ડ યર MBBSના સ્ટૂડન્ટ્સ હતા, જ્યારે અંકિત, નરવીર અને સોમવીર નામના અન્ય ત્રણ સ્ટૂડન્ટ્સ ગંભીર રીતે દાઝી ગયા છે અને તેમને હાલ PGIMS રોહતકમાં એડમિટ કરાયા છે. છ યુવકોની કાર રાત્રે અઢી વાગ્યે અકસ્માતનો ભોગ બની હતી.

આ બનાવ રાય પોલીસ સ્ટેશનની હદમાં બન્યો હતો. તપાસ અધિકારીના જણાવ્યા અનુસાર મેરઠ નેશનલ હાઈવે પર બહલગઢ નજીકનો રસ્તો કામ ચાલતું હોવાથી બંધ હતો. રસ્તાની આડે ત્રણ ફુટના સિમેન્ટ બ્લોક્સ ગોઠવવામાં આવ્યા હતા. રાતના અંધારામાં કારચાલકને આ બ્લોક નહોતો દેખાયો અને કાર સીધી જ તેમાં ધડાકાભેર અથડાઈ હતી.

અકસ્માતમાં મોતને ભેટેલા ત્રણ સ્ટૂડન્ટ્સે આગમાં ભડથું થઈ ઘટનાસ્થળે જ અંતિમ શ્વાસ લીધા હતા. સારવાર હેઠળ રહેલા અન્ય ત્રણ સ્ટૂડન્ટ્સમાંથી એકની હાલત ખૂબ જ ગંભીર છે. એક મૃતકના પરિવારે આ મામલે NHAIના અધિકારી તેમજ રસ્તાનું કામ કરી રહેલી કંપની સામે ફરિયાદ નોંધાવી છે.

મૃતક રોહિતના પિતા જય સિંહે પોતાની ફરિયાદમાં જણાવ્યું છે કે તેમનો દીકરો પોતાના મિત્રો સાથે i20માં હરિદ્વાર જઈ રહ્યો હતો. જોકે, જે જગ્યાએ હાઈવે બ્લોક કરાયો હતો ત્યાં રિફ્લેક્ટર કે રસ્તો બંધ છે તેવું જોઈ શકાય તેવા કોઈ સાઈનબોર્ડ નહોતા મૂકાયા.

આ અકસ્માત NHAIના પ્રોજેક્ટ ડિરેક્ટર અને હાઈવે પર કામ કરી રહેલી કંપનીની બેદરકારીને કારણે થયો છે, અને તેમની વિરુદ્ધ પગલાં લેવાવા જોઈએ. મૃતકના અન્ય એક સંબંધીએ જણાવ્યું હતું કે તમામ મિત્રો રજાઓ માણવા હરિદ્વાર જઈ રહ્યા હતા.

Advertisement

Leave a Reply

error: Content is protected !!